Mat 8 | YomNWM | STEP | Yesu bu kakulumuka mongo ; nkangu wunneni wunlandakana.

Matthew 8

Yesu wubelusa bambevo bawombo

(Malako 1.40-45 ; Luka 5.12-16)

1 Yesu bu kakulumuka mongo ; nkangu wunneni wunlandakana. 2 Buna mutu wumosi wuba kimbevo kibuazi wuyiza kuidi Yesu, wufukama va ntualꞌandi ayi wutuba :

—A Pfumu, enati tidi, wulenda kuaku kumbelusa !

3 Yesu wunonuna koko kuandi, wunsimba ayi wunkamba :

—Nyinga thidi, beluka kuaku. Mu yina thangu wubeluka mu buazi buandi.

4 Bosi Yesu wunkamba :

—Vayi keba, kadi kamba kadi kuidi mutu wumosi mambu mama vayi yenda kimonisa kuidi nganga Nzambi ayi nata dikaba dilomba Moyize mu diambu diba kimbangi kuidi bawu.

(Luka 7.1-10 ; Yowani 4.43-54)

5 Yesu bu katula ku Kafalinawumi, pfumu yimosi yi masodi wuyiza kuidi niandi. Wunleba ayi wutuba :

6 —Pfumu, kisadi kiama kilekidi ku nzo, kimbevo ki binama kidi yandi ayi ziphasi ziwombo kalembo moni.

7 Yesu wumvutudila :

—Nyinga, ndiela kuiza ayi ndiela kumbelusa.

8 Vayi Pfumu yi masodi wutuba :

—A Pfumu ! Minu ndisi wufuana ko muingi ngeyo wukota mu nzo ama vayi tuba kaka diambu dimosi buna kisadi kiama kiela beluka. 9 Bila nzebi diawu, minu mamvama ndidi ku tsi luyalu lu bapfumu ayi ndieti tumina bankaka. Minu kamba kuidi wumosi : “Yenda” makenda ayi minu kamba wunkaka : “yiza” makiza ayi kuidi kisadi kiama : “vanga buabu”, maka vanga buawu.

10 Yesu wusimina buwombo bu kawa mambu mandi. Wukamba batu bobo baba kunlandakananga :

—Bukiedika ndikulukamba ndimueni ko minu kinneni mu Iseli dioso. 11 Ndikulukamba ti batu bawombo bela ba ku Esite ayi ku Wesite bela vuanda mu kipfumu ki diyilu mu kipfumu ki diyilu va kimosi ayi Abalahami, Isaki ayi Yakobi. 12 Vayi bobo bakubukulu kipfumu bela lozo ku nganda kuidi tombi, kuna kuela ba bidilu ayi nkuetoso wu meno.

13 Bosi Yesu wukamba kuidi pfumu yi masodi :

—Vutuka kuaku bika buvangimina boso bu wilukidingi ! Buna kisadi kiandi kibeluka kuandi muna thangu yina.

Wunata bimbevo bieto

(Malako 1.29-34 ; Luka 4.38-41)

14 Thangu Yesu katula ku nzo Piela, wuyenda bata nzitu Piela wuba wuleka va mbuka bila zinzangala zingolo ziba yandi. 15 Yesu bu kansimba mu koko, zinzangala zimana. Bosi wutelama mu kunkubikila bidia.

16 Mu masika mana, banatina Yesu batu bawombo bobo baba ayi ziphevi zimbimbi. Mu mambu mandi katuba muawu kakukila ziphevi beni zimbimbi. Ayi wubelusa batu boso bobo baba bimbevo. 17 Buawu bobo mambu mambikudi Ezayi madedikinina :

Wubonga ziphasi zieto ayi
wunata bimbevo bieto.

Nlonguki kafueti kukivana

(Luka 9.57-62)

18 Yesu bu kamona nkangu wu batu wunzungidila, wutuma minlonguki miandi mu sabuka ku disimu dinkaka di mbu. 19 Nlongi wumosi wu Mina wufikama ayi wunkamba :

—A nlongi, thidi kulandakana koso ku wunkuenda.

20 Vayi Yesu wumvutudila :

—Mimbaku midi ayi minsuku miawu miomi mieti leka, zinuni zidi ayi zindiala ziawu, vayi Muana Mutu kasi ko buangu kikalenda vundisila ntu.

21 Wumosi mu minlonguki miandi wunkanba :

—A Pfumu ! Wundemvukila, vingila theti ndienda ziki dise diama.

22 Vayi Yesu wumvutudila :

—Wundandakana ; bika bafua bazika batu bawu bafua !

Yesu wuviatuka vuka mu ngolo

(Malako 4.35-41 ; Luka 8.22-25)

23 Buna wukuma mu nlungu ayi minlonguki miandi minlandakana. 24 Zimbukila vuka kimosi kingolo kitona mu mbu, mayo mavioka nlungu mu ntela vayi Yesu wuba wuleka.

25 Minlonguki mifikama va kaba, minkotula mu yamikina :

—Pfumu ! Wutuvukisa, tueka mfua !

26 Yesu wuba vutudila :

—Bila mbi lulembo monina boma e ? Batu ba minu kikhioki ! Yesu wutelama, wutemina vuka ayi mbu ; buna ndembama yivutuka.

27 Batu basimina ayi batuba :

—A buna nani niawu muingi bivuka ayi mbu bintumukina e ?

Yesu wuviatuka ziphevi zimbimbi mu ngolo

(Malako 5.1-20 ; Luka 8.26-39)

28 Mu thangu batula ku disimu di mbu, mu zunga ki basi Ngelasa ^{▼▼Ngelasa : Minsekudi minkaka misonika zunga ki basi Ngadala, minkaka misonika zunga ki basi Ngelengesi. Tala Malako 5.1 ; Luka 8.26.}, batu buadi baba ziphevi zimbimbi batotuka mu biziami bayiza kundengana. Zinganzi ziwombo ziba yawu ; diawu kadi mutu wumosi kasia nunga ko mu viokila vana. 29 Bayamikina :

—Diambu mbi tidi kutuvanga ngeyo Muana Nzambi e ? Wizidi mu kutuyamisa tuamina thanguꞌeto yifuana e ?

30 Va ndambu beni vaba nkangu wu zingulu ziba ndia. 31 Buna ziphevi beni zimbimbi zileba Yesu :

—Enati weka tukuka, buna wututuma tukota kueto mu zingulu ziozi !

32 Yesu wuba kamba :

—Yendanu !

Zitotuka mu batu buadi beni zikota mu zingulu. Buna zingulu beni zioso zibotuka nsualu ku mongo ayi zidiama mu mbu, zimana fua.

33 Batu bobo basunga zingulu batina ; bayenda nsualu ku divula ayi basamuna mamo maviokidi ayi mavangimini mu batu bobo baba ziphevi zimbimbi. 34 Batu boso ba divula dina bayiza dengana Yesu ayi bu bammona buna banleba kabotuka mu zunga kiawu.